ప: నినువినా వేరు దిక్కెవరయ్యా మాకు

కరుణించి కాపాడు కడవరకూ ||

చ: నీ కృపయేనయ్యా మా ఈ జన్మము

నిను ధ్యానించితే బ్రతుకే ధన్యము

కోరనయా నిను ఏ అన్యమూ

నిను స్మరియించని జీవితమే వ్యర్ధము ||

చ: బాలులకీవే విద్యాబుద్ధుల నొసగేటి దైవము

ఏ పూజకైనా నీదేనయ్యా అగ్రతాంబూలము

ఆదుకో అన్నా అని ఆక్రోశించిన

అందించేవు నీ అభయ హస్తము

చేదుకో అయ్యా అని చేతులెత్తి మ్రొక్కిన

చేవోడు నీవై ఇచ్చేవు కైవల్యము ||

ప: శ్రీ వినాయకుని పూజించవే మనసా

సిరి తనకు తానై దిగి వచ్చునే ||

చ: ధ్యానింప మనసారా శ్రీ లక్ష్మీ గణపతిని

లేములన్నీ బాపి ఇచ్చేనైశ్వర్యముని

ప్రార్ధిచ మనసారా ఆ విజయ గణపతిని

సమకూర్చేను ధరలోన సకల విజయములని||

చ: సేవించ మనసారా ఆ సిధ్ధి గణపతిని

సర్వ కార్యములను దీర్చి కాపాడునీ జగతిని

భజియించ మనసారా ఆ బుధ్ధి గణపతిని

భయములన్నీ బాపీ ఇచ్చేనూ అభయముని ||

చ: కోరిన కోర్కెలు తీర్చే కొండత దైవమై

వెలసెను విఘ్నేశ్వరుడు ఈ భువిపై

శరణని వేడిన అభయముగా

దండము పెట్టిన అండగా

నిలిచేను ఆ కరుణా సాగరుడు

ఎందెందు వెదికిన అందందు కలడు ||