ప: మదిలోని కలతలు తొలగించు ఆరతులు

షిరిడీలోని సాయి సంకీర్తనలు ||

చ: కిలకిలరావం వినిపించు ఉదయం

నింగిని భానుడు ఉదయించు సమయం

భూపాల రాగం పాడేటి హృదయం

కాకడ ఆరతే సాయికి సుప్రభాతం ||

చ: భిక్షకై సద్గురుడే ఏతెంచు అపరాహ్ణం

ఆచరించు వైశ్వదేవం, అదే సాయి నైవేద్యం

ఆకశాన తారలు తొంగిచూచు తరుణం

అందరం పలుకుదాం భజే సాయినాధం ||

చ: కన్నతండ్రి సాయేనంటూ ప్రార్ధించు భక్తజనం

రేయైతే సాయికి ఊయల చేసేరు అంతరంగం

అడుగడుగున చేయూత అందించు సాయికరం

చెప్పకనే చెబుతోంది సాయి మనసు నవనీతం ||

ప: షిరిడీలో వెలసిన సాయినాధా

నా గుండెగుడిలో కొలువున్నది నీవుకాదా ||

చ: నా కన్నులలో చిందిన నీరు

గంగాయమున సంగమమై నీ పదసన్నిధి చేరు

నీ కళ్ళనుండి జాలువారు కరుణామృత ధారలు

ఆశీస్సుల జల్లులై నా యెద చేరు ||

చ: నా హృదయంలో పొంగుతున్న వేదన

నిత్యాగ్నిహోత్రునికే నివేదన

నీ గుండెలలో మా పైన వెల్లువైన ప్రేమ

అభయమై నడిపించు మమ్ము గురుదైవమా గురుదైవమా ||