ఆరోజు వ్యక్తీకరణ పాఠంలో భాగంగా, కొంతమంది విద్యార్ధులని ఇంటర్వ్యూలు చెయ్యమని ఆయన నన్ను పిలిచారు. వారి మాట కాదనలేకే వెళ్ళినా, నాకు కూడా ఆ విద్యార్ధుల గురించి తెలుస్తుందన్న ఆశకూడా నన్ను వారి తరగతిగదిలోకి వెళ్ళేట్టు చేసింది. కొంతమంది పిల్లలు అల్లరిగా ఉన్నారు. వారి మాష్టారు చాల ప్రయాశపడి వారిని అదుపు చేస్తున్నారు. ఇదిలాగే ఉండగా, ఒక్కొక్కరిగా పిల్లలని నేనుకూడా ఇంటర్వ్యు చేస్తున్నాను, వారి సమాధానాలని విని, నాకు తోచినంతలో ఎవొ సలహాలు ఇచ్చే ప్రయత్నమూ చేసాను.

తరగతిలో ఈ ప్రక్రియ ఇలా సాగుతుండగా…

ఓ నిద్రపోతున్న విద్యార్ధికి జాతకం అఘోరించింది; వాడిని నేను ఇంటర్వ్యు చెయ్యాల్సిన సమయం వచ్చింది.

నా ప్రశ్న: బాబూ, నా పేరు జగన్నాధం. ఇక్కడ ఇంటర్వ్యూలు చేసి ఉత్తమ విధ్యార్ధికి ఉద్యోగం ఇద్దామని వచ్చాను. మరి, నీ గురించి చెప్తావా?

అతని జవాబు: నా పేరు రంగడండి. నేను ఇంటర్వ్యు చేయించుకోడానికి వచ్చానండి.

వాడి తెలివి మీరి, తరగతి విద్యార్ధులంతా పక పకా నవ్వారు, మాష్టారు కూడా కొంత సంకోచించి అదే ఉచితమని భావించారు, నాదేముంది, మరో మాటతో ఇంటర్వ్యూకు స్వస్తి చెప్పాను.

నా సలహా: ఏది చేస్తే అది చేయించుకుంటానంటే, ఇక జీవితంలో నువ్వేం చేస్తావు నాయనా?